ᓄᓇᓕᐸᐅᔭᐃᑦ ᑲᑎᒪᔨᖏᑦ

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏ

ᑲᑎᒪᔨ ᑯᑑᓚ ᒪᑦᓵᔨ, ᑲᑎᒪᔨ ᒪᐃᒐᓐ ᐲᔪ-ᓚᐃᐅᓪ, ᒪᐃᔭᐅᑉ ᑐᓪᓕᐊ ᕉᒪᐃᓐ ᓯᑏᕙᓐᓴᓐ, ᒪᐃᔭ ᒫᑕᓕᓐ ᕆᐊᑦᕘᕐᓐ, ᑲᑎᒪᔨ ᔭᐃᓴᓐ ᕉᓴᐃᓐ, ᑲᑎᒪᔨ ᓴᐃᒪᓐ ᓇᑖᖅ, ᑲᑎᒪᔨ ᑎᐅᕆ ᑖᐱᓐ, ᐊᒻᒪ ᑲᑎᒪᔨ ᔪᐊᓇᓯ ᐊᑯᒪᓕᒃ

ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᐃᓚᒋᔭᐅᕙᑦᑐᑦ ᒪᐃᔭ ᐊᒻᒪᓗ ᑎᓴᒪᐅᔪᖅᑐᑦ ᑲᑎᒪᔨᑦ.

ᓂᕈᐊᖅᑎᑦ ᓄᓇᓕᐸᐅᔭᓂ ᓂᕈᐊᖅᐸᑦᑐᑦ ᒪᐃᔭᑦᓴᒥᑦ ᐊᒻᒪᓗ ᑲᑎᒪᔨᓄᑦ ᐃᓚᒋᔭᐅᖁᔭᓂᑦ, ᐱᖓᓱᓂᑦ ᐊᕐᕌᒍᓂᑦ ᑲᑎᒪᔨᐅᕙᑦᑐᓂᑦ.

ᐃᓚᒋᔭᐅᔪᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᑲᑎᒪᕙᑦᑐᑦ ᐅᓪᓗᕐᓯᐅᑎᒍᑦ ᐋᖅᑭᑦᑕᐅᓯᒪᔪᓂ ᐅᓪᓗᕐᓂ ᐊᕐᕌᒎᑉ ᐃᓗᐊᓂ, ᐊᒻᒪᓗᑦᑕᐅᖅ ᑕᒪᐅᓇᑐᐃᓐᓇᖅ ᑲᑎᒪᕙᒃᑭᓪᓗᑎᒃ ᑲᑎᒪᒋᐊᖃᓕᕋᐃᒐᒥᒃ.

ᑲᑎᒪᔨᑦ ᑎᓕᔭᐅᔪᓐᓇᐸᒻᒥᔪᑦ ᐃᓚᒋᔭᐅᖁᔭᐅᓗᑎᒃ ᑲᑎᒪᔨᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᐱᓕᕆᔨᑦᓴᓂᑦ ᓱᓇᑐᐃᓐᓇᕐᓂᑦ.

 

Council

ᒫᑦᓕᓐ ᕆᐊᑦᕘᕐᓐ, ᓴᐳᔾᔨᔨ, ᐃᖃᓗᓐᓂ ᐃᓅᓚᐅᕐᓂᑯ, ᓄᓇᕗᑦ (ᕗᕈᐳᓱ ᐸᐃᖑᑎᓪᓗᒍ, ᓄᓇᑦᓯᐊᖅ).  ᒪᐃᔭᐅᓚᐅᕐᓯᒪᔪᖅ 2010-ᒥᑦ 2012-ᒧᑦ ᑭᖑᕝᕖᔨᑦᓴᓂᑦ ᓂᕈᐊᕐᓂᖃᖅᑎᓪᓗᒋᑦ ᐃᖃᓗᓐᓂ ᑭᓯᐊᓂ ᓂᕈᐊᒐᑦᓴᐅᓚᐅᕈᓐᓃᖅᑐᖅ ᑭᖑᓪᓕᕐᒥ ᓂᕈᐊᖅᑐᖃᓕᖅᑎᓪᓗᒍ.  2015-ᒥ ᓂᕈᐊᒐᑦᓴᐅᑲᓐᓂᕋᒥ ᓂᕈᐊᖅᑕᐅᓚᐅᖅᑐᖅ.  ᒫᑦᓕᓐ ᐃᑉᐱᒍᓲᑎᖃᑦᓯᐊᖅᑐᖅ ᓄᓇᓕᕐᒥᓂᒃ, ᐊᒻᒪ ᐅᐸᒐᑦᓴᐅᔪᒪᑐᐃᓐᓇᖅᑐᖅ, ᑭᐅᔪᓐᓇᕐᓗᓂ ᐊᒻᒪ ᓵᑕᑦᓴᐅᓗᓂ.

ᒫᑦᓕᓐ ᐊᕐᕌᒍᓂᒃ 25-ᖑᓗᐊᓂᑦ ᐱᓕᕆᓕᓂᐅᓕᖅᑐᖅ ᐱᔾᔪᑎᖃᐅᖅᑐᓂᑦ ᐃᓪᓗᓕᕆᓂᕐᒥᑦ, ᐃᓕᓐᓂᐊᕐᓂᓕᕆᓂᕐᒥᑦ, ᐃᖅᑲᓇᐃᔭᕐᓂᓕᕆᓂᕐᒥᑦ ᐊᒻᒪ ᐱᓕᒻᒪᑦᓴᐅᑎᓕᕆᓂᕐᒥᑦ, ᐃᖅᑲᖅᑐᐃᕕᓕᕆᓂᕐᒥᑦ, ᓄᓇᓕᓐᓂ ᐱᔨᑦᓯᕋᖅᑎᓕᕆᓂᕐᒥᑦ, ᓱᕈᓯᓛᓂᑦ ᐸᐃᕆᕕᓕᕆᓂᕐᒥᑦ, ᐃᓗᓯᓕᕆᓂᕐᒥᑦ, ᓇᒻᒥᓂᓕᕆᓂᕐᒥᑦ ᑮᓇᐅᔭᓕᐅᕋᓱᐊᕈᑎᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒥᓪᓗ, ᐊᒻᒪ ᒐᕙᒪᓕᕆᓂᕐᒥᑦ.  ᐃᓕᓐᓂᐊᕐᓯᒪᔪᖅ ᐱᔭᕇᕐᓯᒪᓪᓗᓂ ᐊᑭᑦᓯᕋᖅ ᒪᓕᒐᕐᓂᑦ ᐃᓕᓐᓂᐊᕐᕕᒻᒥᑦ ᒪᓕᒐᓕᕆᓂᕐᒥᑦ ᐱᔭᕇᕈᑎᖃᖅᑐᓂ ᓯᓚᑦᑐᓴᕐᕕᔾᔪᐊᕐᕕᖓᓂᑦ ᕕᒃᑑᕆᐊ. ᐃᓕᓐᓂᐊᖅᑕᒥᓂᒃ ᐱᔭᕇᕋᒥ, ᐃᖅᑲᓇᐃᔮᖃᓚᐅᖅᑐᖅ ᑲᓇᑕᒥ ᐃᖅᑲᖅᑐᐃᕕᔾᔪᐊᕐᕕᒻᒥ ᐃᖃᖅᑐᐃᔨᕐᔪᐊᕐᒥᑦ ᓯᐅᕌᓐᒥᑦ ᐊᖏᔪᖅᑲᖅᑐᓂ, ᐊᒻᒪ ᒪᓕᒐᑎᒍᑦ ᖃᐅᔨᓴᖅᑎᐅᓗᓂ ᓄᓇᕗᑦ ᑐᖕᖓᕕᒃᑯᓐᓂ, ᐊᒻᒪ ᐃᑦᓯᕙᐅᑕᐅᔪᖅ ᓄᓇᕗᒥ ᒪᓕᒐᑎᒍᑦ ᐱᔨᑦᓯᕋᖅᑏᑦ ᑲᑎᒪᔨᓄᑦ.  ᑕᒪᒃᑯᓇᓂ ᐱᓕᕆᔨᐅᓗᓂ ᐱᓕᕆᓯᒪᔪᒻᒪᕆᐅᕗᖅ ᒪᓕᒐᓕᕆᓂᕐᒥᑦ, ᒪᓕᒐᓕᐊᖑᕙᑦᑐᓂᑦ ᐊᒻᒪ ᐊᑐᐊᒐᓕᕆᓂᕐᒥᑦ.  

ᒫᑦᓕᓐ ᖃᐅᔨᒪᓂᖏᑦ ᑐᖕᖓᕕᖃᖅᑐᑦ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᑎᑦᓯᓂᕐᒥᑦ.  ᐱᓕᕆᓯᒪᔪᖅ ᓴᓇᔨᓕᕆᓂᕐᒥ, ᒐᕙᒪᓕᕆᓂᕐᒥ, ᓄᓇᖃᖅᑳᕐᓯᒪᓕᕆᓂᕐᒥᑦ ᑲᑐᔾᔨᖃᑎᒌᓂ ᐊᒻᒪ ᓄᓇᓕᓐᓂ, ᖃᐅᔨᓴᖃᑕᐅᕙᑦᑐᓂ ᐊᒻᒪ ᓇᓗᓇᐃᔭᐃᖃᑕᐅᕙᑦᑐᓂ ᐋᖅᑭᒋᐊᕈᑎᓂᑦ ᐊᒻᒪ ᐱᓕᕆᔾᔪᑎᑦᓴᓂᑦ ᐊᑲᐅᓂᕐᓴᒃᑯᑦ ᓴᖅᑮᔪᓐᓇᖅᑐᓂᑦ.  ᒫᑦᓕᓐ ᐊᖏᔪᖅᑳᕆᔭᐅᒻᒥᔪᖅ ᐊᔪᖏ ᑲᑐᔾᔨᖃᑎᒌᓄᑦ, ᐊᔪᖏ ᐳᓚᕋᑦᑐᓕᕆᔨᓄᑦ, ᓄᐊᑐᕈᓐ ᕉᐹᑎᒃᔅᑯᓐᓄᑦ, ᐋᑎᒃ ᑎᑲᓐᑖᒥᓇᐃᓯᐊᓐᑯᓐᓂ.  ᐃᖅᑲᓇᐃᔮᕆᓯᒪᔭᖏᑦ ᐊᖏᔪᖅᑳᖑᓪᓗᓂ ᓄᓇᕗᑦ ᐳᓚᕋᑦᑐᓕᕆᓂᕐᒥᑦ, ᐊᒻᒪ ᐊᖏᔪᖅᑳᖑᓪᓗᓂ ᕿᑭᖅᑕᓂ ᓱᓕᔪᕐᓂᐊᖅᑎᓄᑦ.

MayorRedfern@city.iqaluit.nu.ca

ᔭᐃᓴᓐ ᐃᓅᓚᐅᖅᑐᖅ ᐊᒻᒪ ᓱᕈᓯᐅᓚᐅᖅᑐᖅ ᐋᑐᕚᒥ ᐊᒻᒪ ᐃᖃᓗᓐᓂᑦ ᐊᓂᕐᕋᖃᕐᓯᒪᓕᖅᑐᖅ ᐊᕐᕌᒍᓂᑦ 13-ᓂᑦ.

ᖁᕕᐊᒋᓪᓚᕆᑦᑕᖏᑦ ᐱᓕᕆᐊᑦᓴᐃᑦ ᐱᔾᔪᑎᖃᖅᐸᑦᑐᑦ ᐃᒻᒥᓂᒃ ᐅᓪᓛᕈᒻᒥᑕᕐᓂᓪᓗ ᐊᒻᒪ ᑕᒪᒃᑯᓇᓂ ᐱᓕᕆᖃᑕᐅᕙᑦᑐᖅ ᔫᒥ ᐃᓕᓐᓂᐊᕐᕕᒻᒥ.

ᐃᓅᓯᓕᕆᔨᐅᓯᒪᔪᖅ ᐅᖃᖃᑕᐅᔨᐅᓗᓂ ᐊᒻᒪ ᖁᕕᐊᒋᔭᖃᖅᑐᖅ ᐃᑲᔪᖃᑦᑕᕆᐊᑦᓴᖅ ᐊᑭᓕᕐᓱᖅᑕᐅᒐᓂ, ᖁᕕᐊᒋᔭᖃᖅᑐᖅ ᐱᖕᖑᐊᕈᑎᓂᑦ ᒪᑭᑦᑕᐅᑎᒃᑯᑦ ᐊᓯᖏᓐᓂᓪᓗ ᐊᒻᒪ ᑕᑯᕋᓐᓈᕈᒪᓲᖑᓪᓗᓂ ᐱᖕᖑᐊᖅᑐᓂᑦ ᓱᔭᑦᓴᖃᕈᓐᓃᕋᐃᒐᒥ.

j.rochon@city.iqaluit.nu.ca

ᔪᐊᓇᓯ ᐊᑯᒪᓕᒃ ᓇᒥᑐᐃᓐᓇᑦᓯᐊᖅ ᐱᓕᕆᔨᐅᓯᒪᓕᖅᑐᖅ ᐱᔾᔪᑎᖃᐅᖅᑐᓂᑦ ᐃᓄᓐᓂᒃ ᐊᒻᒪ ᓄᓇᓕᓐᓂ ᒐᕙᒪᓕᕆᓂᕐᒥᑦ, ᐊᒻᒪ ᐆᒪᔪᓕᕆᓂᕐᒥᑦ ᐊᐅᓚᑦᓯᔾᔪᑎᓂ, ᐅᔭᕋᕐᓂᐊᓂᒃᑯᑦ, ᐃᓕᓐᓂᐊᖅᑐᓕᕆᓂᕐᒥᑦ, ᐃᓄᓕᕆᓂᕐᒥᑦ ᐊᒻᒪ ᐃᓕᖅᑯᓯᓕᕆᓂᕐᒥᑦ ᐊᒻᒪ ᑮᓇᐅᔭᓕᐅᕋᓱᐊᕈᑎᓕᕆᓂᕐᒥᑦ ᐱᕙᓪᓕᐊᔪᓕᕆᓂᕐᒨᖓᔪᓂᑦ.  ᓯᕗᓕᖅᑎᐅᖃᑕᐅᓯᒪᔪᖅ ᐊᔾᔨᒌᖏᑦᑐᓂ ᐃᓄᓐᓅᖓᔪᓂᑦ ᑲᑐᔾᔨᖃᑎᒌᓂ, ᐱᓕᕆᕝᕕᒻᒪᕆᐊᓂ ᑲᓇᑕᒥ ᒐᕙᒪᓕᕆᔩᑦ ᐊᒻᒪ ᐊᔾᔨᒌᖏᑦᑐᓂᑦ ᒐᕙᒪᓕᕆᔾᔪᑎᓂᑦ. ᓄᓇᕗᑦ ᑐᖕᖓᕕᒃᑯᓐᓂ ᐊᖏᔪᖅᑳᖑᖃᑕᐅᓯᒪᔪᖅ ᐊᒻᒪ ᐃᖅᑲᓇᐃᔭᖅᑎᐅᓕᖅᑐᖅ ᑲᑭᕙᒃ ᑲᑐᔾᔨᖃᑎᒌᒃᑯᖏᓐᓄᑦ ᐃᖅᑲᓇᐃᔭᖅᑎᓕᕆᓂᒃᑯᑦ ᐱᔨᑦᓯᕋᖅᑎᐅᓗᓂ ᐊᒻᒪ ᓴᖅᑭᔮᖅᑎᒋᐊᓕᓐᓂᑦ ᑐᑭᒧᐊᑦᑎᑦᓯᔨᐅᓗᓂ.  ᒪᐃᔭᓚᐅᕐᓯᒪᔪᖅ ᐃᑉᐱᐊᕐᔪᒻᒥ ᐃᓱᒪᒋᔭᒥᓂᒃ ᐅᖃᑦᑕᐃᓕᒪᕙᓚᐅᕋᓂ ᓄᓇᓕᓐᓄᑦ ᓯᕗᓕᖅᑎᐅᓗᓂ ᐅᖃᐅᓯᖃᖅᐸᓚᐅᖅᑐᓂ ᐊᑦᑐᐃᔾᔪᑎᑦᓴᐅᒐᔭᖅᑐᓂᑦ ᓴᖅᑭᓚᐅᖅᑐᓂᑦ ᓇᓂᓯᕕᒃ ᐅᔭᕋᕐᓂᐊᕐᕕᒃ ᒪᑐᔭᐅᓯᒪᓕᖅᑎᓪᓗᒍ.

j.akumalik@city.iqaluit.nu.ca

ᑯᑑᓚ ᒪᑦᓵᔨ ᐃᖃᓗᓐᓄᑦ ᓄᑦᑎᓚᐅᕐᓯᒪᒻᒪᓂᑦ ᐊᕐᕌᒍᐃᑦ ᐱᖓᓲᓕᖅᑐᑦ ᐃᓚᒋᓪᓗᒋᒃ ᓄᓕᐊᓂ ᐊᒻᒪ ᐸᓂᓛᓂ, ᓵᒃᕼᐃᐅᓪ.  ᑐᕌᓐᑐᒥᐅᑕᐅᓚᐅᖅᑐᖅ ᓯᕗᓪᓕᖅᐹᒥ 2001-ᒥᓂᒃ ᐃᓅᕕᒥᓂᕐᒥᓃᖕᖔᖅᑐᓂ ᔨᒻᐹᑉᐅᐄᒥᑦ.  ᐅᖃᕐᓯᒪᔪᖅ ᑐᕌᒐᕆᓯᒪᒻᒪᕆᑦᓯᒪᒐᒥᐅᒃ ᐱᐅᔪᒃᑯᑦ ᐊᓯᔾᔩᔪᒪᓪᓗᓂ ᓄᓇᓕᓐᓄᑦ.  ᓯᕗᓕᖅᑎᐅᓂᖅ ᐊᒻᒪ ᓄᓇᓕᓐᓂ ᐱᔨᑦᓯᕋᖅᑎᐅᓂᖅ ᐅᓂᒃᑳᕆᔪᓐᓇᒻᒪᕆᑦᑕᖏᑦ.  ᐊᕐᕌᒍᓂ ᐱᖓᓱᓂ ᑕᒫᓃᓯᒪᓕᕋᒥ, ᑯᑑᓚ ᐃᓚᒋᔭᐅᓯᒪᓕᖅᑐᖅ ᓄᓇᓕᐸᐅᔭᒃᑯᑦ ᑲᑎᒪᔨᕋᓛᖁᑎᖏᓐᓄᑦ ᑮᓇᐅᔭᓕᐅᕋᓱᐊᕈᑎᓕᕆᓂᕐᒥᑦ ᐱᕙᓪᓕᐊᔪᓕᕆᓂᕐᒧᑦ ᐅᖃᐅᓯᖃᖅᐸᑦᑐᓂᑦ.  ᐃᓚᒋᔭᐅᓂᕐᒥᓂ ᓴᓇᖃᑕᐅᕙᓚᐅᖅᑐᖅ ᓯᑎᒃᑯᑦ ᑮᓇᐅᔭᓕᐅᕋᓱᐊᕈᑎᓕᕆᓂᕐᒥᑦ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᑦᓴᒥᑦ. ᐃᓚᒋᔭᐅᓗᓂ ᑐᕌᒐᖃᖅᐸᓚᐅᖅᑐᖅ ᐃᓪᓗᓂᑦ ᐊᒥᒐᕐᓯᓂᐅᕙᑦᑐᒥᑦ, ᓂᕿᖃᑦᓯᐊᓂᕐᒥᑦ, ᖃᓄᐃᖏᑦᓯᐊᖅᑐᓕᕆᓂᕐᒥᑦ, ᐱᓕᕆᕝᕕᓕᕆᓂᕐᒥᑦ ᒪᑭᒪᔾᔪᑎᑦᓴᓂᑦ, ᐊᒻᒪ ᑎᓯᔪᓂᑦ ᓴᓂᓕᕆᐅᑎᓂᑦ ᐊᐅᓚᑦᓯᔾᔪᑎᓕᕆᓂᕐᒥᑦ.

ᑯᑑᓚ ᐃᓚᒋᔭᐅᒋᐊᖕᖓᓕᓚᐅᖅᑐᖅ ᓄᓇᓕᓐᓂ ᐱᓕᕆᔾᔪᑎᓂ ᐱᔭᕇᓚᐅᖅᑐᓂ ᐃᓕᓐᓂᐊᕈᑎᓂᑦ ᓄᓇᓕᓐᓂ ᐱᓕᕆᔨᐅᓂᕐᒨᖓᔪᓂᑦ ᐱᓕᕆᐊᑦᓴᓕᐊᖑᓯᒪᔪᒥᑦ ᐋᓐᑎᐅᕆᐅᑉ ᒥᓂᔅᑕᖓᑕ ᓄᓇᓕᓐᓂ ᐱᓕᕆᔾᔪᑎᓕᕆᓂᕐᒥᑦ ᐊᒻᒪ ᐃᓪᓗᓕᕆᓂᕐᒥᑦ, ᐊᒻᒪ ᐃᓕᓐᓂᐊᖅᑎᑕᐅᓪᓗᑎᒃ ᑲᑐᔾᔨᖃᑎᒌᖏᓐᓄᑦ ᓄᓇᓕᓐᓂ ᐊᐅᓚᑦᓯᔩᑦ, ᐊᓪᓚᑦᑏᑦ ᐊᒻᒪ ᑮᓇᐅᔭᓕᕆᔩᑦ ᐋᓐᑎᐅᕆᐅᒥ. ᓄᓇᓕᐸᐅᔭᐃᑦ ᑭᑦᓯᓄᕐᒦᓚᐳᖅᑐᖅ ᐊᕐᕌᒍᒥᑦ ᐊᑕᐅᓯᕐᒥᑦ ᐱᓕᕆᐊᑦᓴᒃᑯᑦ ᐊᖏᔪᖅᑳᖃᖅᑐᓂ ᑎᒥᐅᔪᒥ ᐊᖏᔪᖅᑳᒻᒪᕆᒻᒥᑦ.  ᐱᔭᕇᕋᒥᐅᒃ ᑖᓐᓇ, ᑯᑑᓚ ᐃᖅᑲᓇᐃᔭᓕᓚᐅᖅᑐᖅ KPMG ᒪᓕᒐᒃᑯᑦ ᓴᐳᔾᔨᔨᐅᓂᕐᒥ, ᓇᒻᒥᓂᖃᐅᑎᓂᑦ ᐊᐅᓚᑦᓯᔾᔪᑎᓂᑦ ᖃᐅᔨᓴᖅᑎᐅᓗᓂ ᐱᓕᕆᐊᖃᓗᐊᖅᐸᑦᑐᓂ ᑭᒃᑯᑐᐃᓐᓇᕐᓂᑦ ᐱᔨᑦᓯᕋᖅᑎᐅᓗᓂ.  ᐃᓚᖏᑦ ᐱᓕᕆᐊᑦᓴᐃᑦ ᑲᒪᒋᓯᒪᔭᖏᑦ ᑲᑐᔾᔨᖃᑎᒌᓂᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪ ᓱᓇᑐᐃᓐᓇᕐᓄᑦ ᐋᖅᑭᒋᐊᕈᑎᑦᓴᓂᑦ ᐸᕐᓇᐅᑎᓕᐅᕐᓂᕐᒥᑦ.

ᑯᑑᓚ ᐃᖅᑲᓇᐃᔭᖅᑎᐅᓯᒪᓕᖅᑐᖅ ᓄᓇᕗᑦ ᒐᕙᒪᒃᑯᑦ ᐃᓚᒌᓂᑦ ᐃᓄᓕᕆᓂᕐᒧᑦ ᐱᔨᑦᓯᕋᖅᑎᐅᓗᓂ ᐊᑐᐊᒐᕐᓂᑦ ᖃᐅᔨᓴᖅᑎᐅᓗᓂ ᐊᕐᕌᒍᓄᑦ ᐱᖓᓱᓄᑦ.

ᑯᑑᓚ ᐃᓕᓐᓂᐊᕈᑎᒥᑦ ᐱᔭᕇᕐᓯᒪᔪᖅ ᐱᓕᕆᔾᔪᑎᓕᕆᓂᕐᒥᑦ ᓄᓇᕐᔪᐊᕐᒥ ᓇᒥᑐᐃᓐᓇᖅ ᐱᕙᓪᓕᐊᔪᓕᕆᓂᕐᒥᑦ ᐊᒻᒪ ᑐᓴᐅᒪᐅᑎᓕᕆᓂᕐᒥᑦ ᔪᐊᒃ ᓯᓚᑦᑐᓴᕐᕕᔾᔪᐊᕐᕕᒻᒥᑦ, ᑐᕌᓐᑐᒥ, ᐃᓕᓐᓂᐊᕈᑎᓄᑦ ᐃᑲᔫᓯᐊᓚᐅᕐᓯᒪᓪᓗᓂ ᐃᓕᓐᓂᐊᑦᓯᐊᕐᓯᒪᔪᒻᒪᕆᐅᓂᕐᒥᓄᑦ ᐊᒻᒪ ᓯᕗᓕᖅᑎᐅᓂᕐᒥᑦ.  ᐊᑎᖃᓚᐅᖅᑐᖅ ᓯᓚᑦᑐᓴᕐᕕᔾᔪᐊᕐᕕᐅᑉ ᐊᖏᔪᖅᑳᖓᑕ ᐊᑎᖃᕐᕕᖓᓂ ᐃᓕᓐᓂᐊᑎᑦᓯᐊᕙᒻᒪᕆᓐᓂᑦ.  ᐱᔭᕇᕈᑎᖃᕐᒥᔪᖅ ᓄᓇᕐᔪᐊᕐᒥᑦ ᖃᐅᔨᓴᐅᑎᓕᕆᓂᕐᒥᑦ ᒪᒃᒫᔅᑐ ᓯᓚᑦᑐᓴᕐᕕᔾᔪᐊᕐᕕᒻᒥᑦ, ᕼᐋᒧᑕᒥ ᐊᒻᒪ ᐱᓕᕆᔨᒻᒪᕆᐅᓂᕐᒥᑦ ᐱᑖᖅᑎᑕᐅᓯᒪᓗᓂ ᓄᓇᓕᓐᓂ ᐱᓕᕆᔨᐅᓂᕐᒧᑦ ᑐᕌᖓᔪᒥᑦ ᑲᑐᔾᔨᖃᑎᒌᖏᓐᓂᑦ ᐱᓕᕆᔩᑦ.  ᑯᑑᓚ ᐱᔭᕇᕐᓯᒪᒻᒥᔪᖅ ᐃᓕᓐᓂᐊᕈᑎᓂᑦ ᐱᕙᓪᓕᐊᔪᓕᕆᔨᐅᓂᕐᒥᑦ ᑐᓴᒐᑦᓴᓂᑦ ᐊᒻᒪ ᑐᓴᐅᒪᐅᑎᓕᕆᓂᕐᒥᑦ ᐱᓕᕆᔨᒻᒪᕆᐅᓯᒪᓪᓗᓂ.

ᐃᓚᒋᔭᐅᕕᖃᕐᒥᔪᖅ ᐋᓐᑎᐅᕆᐅᒥ ᑲᑐᔾᔨᖃᑎᒌᖏᓐᓄᑦ ᓄᓇᓕᓐᓂ ᐱᓕᕆᔨᐅᓂᕐᒨᖓᔪᓄᑦ ᐊᒻᒪ ᑲᑐᔾᔨᖃᑎᒌᕐᔪᐊᖏᓐᓄᑦ ᑭᒃᑯᑐᐃᓐᓇᕐᓄᑦ ᐃᖅᑲᓇᐃᔭᖅᑎᐅᔪᓄᑦ ᑲᓇᑕᒥ.

ᑯᑑᓚᐅᑉ ᖁᕕᐊᒋᔭᖏᑦ ᐅᖃᐅᓯᖃᕐᓂᖅ ᐊᒻᒪ ᐅᖃᓕᒫᕐᓂᖅ ᐱᔾᔪᑎᖃᖅᑐᓂᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᓕᕆᓂᕐᒨᖓᔪᓂᑦ ᐱᔾᔪᑎᐅᔪᓂᑦ, ᓂᔾᔭᐅᓯᔭᖅᑐᓂᑦ ᑐᓴᕋᓐᓈᕐᓂᖅ ᐊᒻᒪ ᑕᑯᕋᓐᓈᕐᓂᖅ ᓵᑯᖅᑐᓂᑦ (ᐊᕐᓴᓂᑦ ᐊᕿᓯᕙᑦᑐᓂᑦ).  ᓵᑯᖅᑎᒻᒪᕆᐅᓯᒪᔪᖅ ᐊᒻᒪ ᓈᓚᐅᑎᑦᓯᐅᓯᒪᓪᓗᓂ ᑐᕌᓐᑐᒥ Vibe 1055 FM-ᑯᓐᓂ.

k.matshazi@city.iqaluit.nu.ca

ᕉᒪᐃᓐ ᐃᖃᓗᓐᓅᓚᐅᕐᓯᒪᔪᖅ ᑐᕌᓐᑐᒥᑦ 1999-ᖑᑎᓪᓗᒍ.  ᐊᓂᕐᕋᒥᐅᖃᑎᓕᒃ ᐊᐃᑉᐸᕐᒥᓂᒃ ᒫᑦᓕᓐ ᐊᓚᒃᑲᕆᐊᓪᓚᕐᒥᑦ ᐊᒻᒪ ᕿᑐᕐᖓᖏᓐᓂᑦ.

ᕉᒪᐃᓐ ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒥ ᐊᖏᔪᖅᑳᕆᔭᒧᑦ ᑐᓪᓕᐅᓯᒪᓕᖅᑐᖅ ᐊᕐᕌᒍᓂᑦ ᑎᓴᒪᐅᔪᖅᑐᓂᑦ (8) ᐊᒻᒪ ᐃᓕᓴᐃᔨᐅᓚᐅᕐᓯᒪᓪᓗᓂ ᓯᕗᓂᐊᒍᑦ.  ᕚᓕᐹᖅᑎᓂᑦ ᐃᓕᓴᐃᔨᐅᔪᖅ ᐊᒻᒪ ᐃᓚᒋᔭᐅᓗᓂ ᑲᑎᒪᔨᖏᓐᓄᑦ ᓄᓇᕘᒥ ᓵᑯᖅᑏᑦ ᑲᑐᔾᔨᖃᑎᒌᖏᓐᓂ. ᕉᒪᐃᓐ ᖁᕕᐊᒋᔭᖃᖅᑐᖅ ᐊᖑᓇᓱᓐᓂᕐᒥᑦ ᐊᒻᒪ ᓄᓇᒥ ᑭᐱᖕᖑᐃᔭᕐᓂᕐᒥᑦ ᓱᔭᑦᓴᖃᖕᖏᑐᐊᕋᒥ ᐊᓯᐊᒍᑦ.

r.stevenson@city.iqaluit.nu.ca

ᓴᐃᒪᓐ ᓇᑖᖅ ᐃᓅᓂᑰᔪᖅ 1943-ᒥᒃ ᐱᕈᖅᓴᓂᑰᔪᕐᓗ ᐊᒥᑦᑐᖅᒥᐅᓂ ᐃᒡᓗᓕᐅᑉ ᖃᓂᒋᔮᓂ, ᓄᓇᕗᒻᒥ.  ᓄᓕᐊᓕᒃ ᐋᓂ ᓇᑖᖅᒥᒃ ᑭᒻᒥᕈᒻᒥᐅᑕᖅᒥᒃ. ᕿᑐᕐᖓᖏᑦ ᐱᕈᐊᓯᒪᓕᕐᑐᑦ ᐃᖅᑲᓇᐃᔭᕐᑎᐅᓕᕐᑐᓪᓗ ᐱᔨᑦᓯᕐᑎᐅᔪᓂᒃ ᓄᓇᕗᑦ ᒐᕙᒪᒃᑯᖏᓐᓂᑦ.

ᓴᐃᒪᓐ ᐊᖏᔪᖅᑲᐅᑎᓂᑦ ᐃᓚᒋᔭᐅᖃᑦᑕᕐᓯᒪᔪᖅ ᐊᒥᓱᒐᓚᐅᔪᓂᒃ ᓄᓇᓕᓐᓂ ᑲᑎᒪᔨᕋᓛᖏᓐᓂᑦ ᐱᖃᓯᐅᑎᓪᓗᒍ ᓄᓇᕘᒥ ᑐᙵᕕᒃᑯᓐᓂ, ᐊᖑᓇᓱᑦᑐᓕᕆᔨᒃᑯᑦ ᑲᑎᒪᔨᖏᓐᓂᑦ, ᓄᓇᕘᒥ ᓂᕐᔪᑎᓕᕆᓂᕐᒧᑦ ᒥᐊᓂᕐᓯᔨᖏᓐᓂᑦ, ᐃᖃᓗᓐᓂ ᐃᓪᓗᓕᕆᔨᖏᓐᓄᑦ ᐊᐅᓚᑦᓯᔨᐅᖃᑕᐅᓯᒪᔪᖅ ᐊᒻᒪᓗ ᓄᓇᕘᒥ ᐃᓪᓗᓕᕆᔨᕐᔪᐊᒃᑯᖏᓐᓄᑦ.

ᐃᖅᑲᓇᐃᔭᕐᑎᐅᓂᑰᔪᖅ ᒥᒃᓯᑎᑦᓂ ᒐᕙᒪᖏᓐᓄᑦ ᐱᒋᐊᕐᓱᒍ 1982-ᒥᑦ 2001-ᒧᑦ ᐃᓕᓐᓂᐊᕐᑐᓕᕆᔨᒃᑯᓐᓂᑦ ᐊᒻᒪᓗ ᐃᖅᑲᓇᐃᔭᕐᓯᒪᔪᖅ ᐊᒥᓱᒐᓚᐅᔪᓄᑦ ᑲᓇᑕᒥ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐱᓕᕆᕕᖏᓐᓄᑦ, ᐊᕙᑎᓕᕆᓂᕐᒧᑦ ᐱᓕᕆᕕᖏᓐᓂᑦ ᐊᒻᒪᓗ ᓯᓚᑦᑐᕐᓴᕐᕕᔾᔪᐊᕐᓄᑦ ᑲᒪᒋᔭᐅᕕᖏᓐᓂᑦ.

ᓴᐃᒪᓐ ᑲᒪᖃᑕᐅᖃᑦᑕᕐᓯᒪᔪᖅ ᓄᓇᓕᐸᐅᔭᒃᑯᑦ ᐱᔭᒃᓴᕆᕙᑦᑕᖏᓐᓄᑦ ᐅᑭᐅᓄᑦ 16-ᓄᖅ. ᐱᓕᕆᖃᑕᐅᖃᑦᑕᕐᒥᔪᖅ ᐃᓅᓯᓕᕆᔪᓂᒃ ᐅᖃᐅᔾᔪᐃᔨᐅᖃᑕᐅᓪᓗᓂ ᐃᖅᑲᖅᑐᐃᕕᑦᑎᒎᖏᑦᑐᖅ ᐃᓅᓯᓕᕆᔭᐅᕙᑦᑐᓂᒃ ᐅᑭᐅᑦ ᖁᓕᑦ ᐅᖓᑖᓂ ᑲᒪᖃᑕᐅᕙᑦᑐᖅ ᓱᓕ ᑎᒍᔭᐅᒪᔪᓂᒃ ᐳᓛᕆᐊᖃᑦᑕᕐᓂᒃᑯᑦ ᐃᑲᔪᕆᐊᕐᓱᒋᑦ ᐅᖃᓪᓚᐅᔾᔨᓂᒃᑯᑦ.

ᓴᐃᒪᓐ ᐱᓯᒪᑦᓯᓕᕐᑐᖅ ᐊᒥᓱᒐᓚᐅᔪᓂᒃ ᑐᓐᓂᐅᓯᐊᕆᓯᒪᔭᒥᓂᒃ ᐱᖃᓯᐅᑎᓪᓗᒍ ᑯᐃᓐ ᑭᒡᒐᕐᑐᖅᑎᖓᓂᑦ ᑐᓐᓂᐅᓯᐊᒥᒃ, ᓄᓇᕗᑦ ᑲᒥᓴᓇᖓᓐᓂᑦ ᑐᓐᓂᐅᓯᐊᒥᒃ ᐊᒻᒪᓗ ᐊᑯᓂᐅᔪᒧᑦ ᐱᔨᑦᓯᖃᑕᐅᖃᑦᑕᕐᓂᕐᒧᑦ ᐊᑭᓕᖅᓱᕐᑕᐅᓇᑎᒃ ᑐᓐᓂᐅᓯᐊᖃᕐᓯᒪᒻᒥᔪᖅ ᓄᓇᓕᐸᐅᔭᐃᑦ ᐃᖃᓗᐃᑦ-ᑯᓐᓂᑦ.

ᑎᐅᕆ ᑖᐱᓐ ᐃᓅᓂᑰᔪᖅ ᓅᕙᓐᓛᓐ-ᒥ ᐱᕈᖅᓴᓂᑰᔪᖅ ᐸᓛᖕᒃ ᓴᑉᓛᓐ, ᓄᓇᓕᕋᓛᖅ ᑯᐃᐱᒃᒥᐅᓂ ᓄᓇᑭᓐᓂᖅᓴᖓᓂ ᐅᐊᓐᓇᖓᑕ ᓯᔾᔭᖅᐸᓯᖓᓂ. ᐃᓕᓐᓂᐊᕐᕕᐊᓗᒻᒦᓐᓂᑰᔪᖅ ᓕᓇᒃᔅᕕᐅᓪ-ᒥ,  ᑯᐃᐱᒃᒥ, ᓵᒻᐸᓚᐃᓐ ᓯᓚᑦᑐᓴᕐᕕᖓᓂ ᐊᒻᒪᓗ ᓯᓚᑦᑐᓴᕐᕕᔾᔪᐊᒧᐊᕐᓂᑰᔪᖅ ᓅ ᐳᕋᓐᔅᐅᐃᒃᒥ ᕗᕆᑦᑐᕆᒃᑕᓐ-ᒥ, ᓅ ᐳᕋᓐᔅᐅᐃᒃ. 

ᑎᐅᕆ ᐃᖃᓗᓐᓄᐊᕐᓂᑰᔪᖅ 1999-ᖑᑎᓪᓗᒍ ᑲᒪᔨᕈᖅᑎᑕᐅᓪᓗᓂᓗ ᓄᓇᕗᑦ ᓅᔅ/ᓄᐊᑦ. ᐊᒻᒪᓗ ᐅᑭᐅᓄᑦ ᖁᓕᓄᑦ, ᐱᓇᓱᐊᕈᓯᐅᑉ ᓄᕐᖑᖓᒍᑦ ᑕᐃᒪᙵᓂᑦ ᐅᐸᖃᑦᑕᕐᑐᖅ ᓱᕈᓯᕐᓄᑦ ᐱᒡᒐᐅᑎᓖᑦ ᐊᖏᕐᕋᖓᓐᓄᑦ, ᐃᖃᓗᓐᓂ. ᑎᐅᕆ ᓇᒻᒥᓂᖃᕐᑎᐅᔪᖅ ᐊᐅᓚᑦᓯᔨᐅᓪᓗᓂᓗ ᓇᒻᒥᓂᖃᕐᑎᐅᓂᕐᒧᑦ ᐊᖏᔪᖅᑲᐅᕕᑦᑎᓂ. ᐃᓱᒪᕐᓱᓕᕋᐃᒐᒥ, ᑎᐅᕆ ᐃᖃᓗᒐᓱᒍᒪᕙᑦᑐᖅ, ᑯᒃᑭᑦᑕᐸᐅᑎᕐᐸᑦᑐᖅ ᐊᒻᒪᓗ ᕼᐋᑭᒃᓂᕐᒧᑦ.

t.dobbin@city.iqaluit.nu.ca

ᓄᐊ ᐃᓅᓚᐅᕐᓯᒪᔪᖅ ᑕᒫᓂ ᐃᓐᓇᕈᖅᑐᓂ ᐳᕉᐳᓱ ᐸᐃᒥ (ᐃᖃᓗᐃᑦ) ᐊᒻᒪ ᐱᖓᓲᔪᖅᑐᑦ ᓇᔭᖏᑦ.  ᓄᐊ ᐊᐃᑉᐸᖓᑕ ᐊᑎᖓ ᐊᐃᓂᐊ ᓄᓱᑦᑕᖅ; ᒪᕐᕉᓐᓂᒃ ᕿᑐᕐᖓᓖᒃ, ᔮᓱᐊ ᐊᒻᒪ ᒪᓚᐃᔭ ᐊᒻᒪ ᑎᒍᐊᖕᖑᐊᖃᖅᑐᑎᒃ ᑖᓂᐅᓪᒥᑦ, ᑎᐅᓪ ᐊᒻᒪ ᒫᑕ.

ᓄᐊ ᐃᓕᓐᓂᐊᓚᐅᕐᓯᒪᔪᖅ ᐃᖃᓗᐃᑦ ᐃᓕᓐᓂᐊᕐᕕᐊᓗᐊᓂ ᒍᐊᕐᑕᓐ ᕌᐳᕐᓴᓐ ᐃᓕᓐᓂᐊᕐᕕᒻᒥᑦ ᑕᐃᔭᐅᑎᓪᓗᒍ ᐊᒻᒪ ᐃᖅᑲᓇᐃᔭᖅᑎᐅᓚᐅᖅᑐᖅ ᐊᐃᐲᓰᒃᑯᓐᓂ ᐱᓕᕆᔾᔪᑎᓕᕆᔨᐅᓗᓂ, ᐊᖏᔪᖅᑳᖑᓂᕐᒥᑦ ᐃᖅᑲᓇᐃᔭᖅᑎᐅᓕᖅᑐᓂ ᐃᖅᑲᓇᐃᔭᕐᕕᒻᒥ ᐱᕐᕈᓗᐊᕿᓚᐅᖅᑐᖅ ᑕᐅᑐᒍᓐᓃᕈᑎᒋᓚᐅᖅᑕᒥᓂᒃ.

ᓄᐊ ᐃᖅᑲᓇᐃᔭᖅᑐᓂ ᑕᐅᑐᒍᓐᓃᓚᐅᖅᑐᖅ ᐊᒻᒪ ᐊᓯᖏᓐᓂᑦ ᐱᔾᔪᑎᖃᓕᖅᑐᓂ ᐱᓚᐅᖅᑐᖅ.  ᑭᓯᐊᓂ ᑕᐃᒪᐃᓕᖓᑐᐃᓐᓇᓚᐅᖕᖏᑦᑐᖅ ᒪᒥᓴᒐᓱᓐᓂᕐᒥᓂ.  ᐃᒻᒥᓂᒃ ᐱᔪᓐᓇᐅᑎᒋᓂᐊᖅᑕᒥᓂᒃ ᐱᓕᒻᒪᑦᓴᖅᐸᓚᐅᖅᑐᖅ ᐊᒻᒪ ᐊᔭᐅᑉᐱᐊᖃᑐᐃᓐᓇᖅᑐᓂ ᓇᓕᐊᓐᓄᕋᕈᓐᓇᕐᓯᓚᐅᖅᑐᖅ ᐱᓕᒻᒪᑦᓴᓚᐅᖅᑐᓂ ᐊᒻᒪ ᖃᕋᑕᐅᔭᓕᕆᔾᔪᑎᓂᑦ ᐃᑲᔫᑎᖃᖅᐸᑦᑐᓂ ᐊᒻᒪ ᐅᖄᓚᐅᑎᓂᑦ ᐊᑐᖅᐸᑦᑐᓂ.  ᐊᖏᖅᑕᐅᓚᐅᕐᓯᒪᔪᖅ ᕿᒻᒥᑖᕈᒪᒻᒪᑦ ᑕᐅᑐᖕᖏᑦᑐᓄᑦ ᐊᑐᖅᑕᐅᕙᑦᑐᓂᑦ ᑭᓯᐊᓂ ᕿᒻᒥᖓ ᐅᑭᐅᖅᑕᖅᑐᒦᒍᓐᓇᓚᐅᖏᒻᒪᑦ ᓄᖅᑲᖅᑎᑕᐅᒋᐊᖃᓕᓚᐅᖅᑐᖅ.

ᓄᐊ ᖃᓄᑐᐃᓐᓇᑦᓯᐊᖅ ᐊᑭᓕᕐᓱᖅᑕᐅᒐᓂ ᐱᔨᑦᓯᕋᖅᑎᐅᖃᑕᐅᕙᑦᑐᖅ.  ᐊᖏᔪᖅᑳᖑᔪᖅ ᓄᓇᕘᒥ ᑎᒥᒃᑯᑦ ᐊᔪᕈᑎᓕᓐᓂᑦ ᑲᑐᔾᔨᖃᑎᒌᓄᑦ ᒪᑭᓐᓇᓱᐊᖅᑏᑯᓐᓂ, ᑲᑎᒪᔨᐅᖃᑕᐅᔪᖅ ᖃᔪᖅᑐᕐᕕᒻᒧᑦ ᐊᐅᓚᑦᓯᔨᐅᔪᓂᑦ ᖃᔪᖅᑐᕐᕕᒻᒥᑦ ᐊᒻᒪ ᑲᑎᒪᔨᐅᖃᑕᐅᒋᓪᓗᓂ ᑲᓇᑕᒥᐅᑕᐃᑦ ᑲᑐᔾᔨᖃᑎᒌᖏᓐᓄᑦ ᓄᓇᓕᓐᓂ ᐃᓅᓇᓱᐊᓂᕆᓂᕐᒨᖔᔪᓄᑦ ᑭᒡᒐᖅᑐᖅᐸᑦᑐᒋᑦ ᐅᑭᐅᖅᑕᖅᑐᒥᐅᑕᐃᑦ.  ᓄᐊ ᑮᓇᐅᔭᓕᕆᔨᐅᒻᒥᔪᖅ ᒪᓕᒐᓕᕆᓂᒃᑯᑦ ᐃᑲᔫᓯᐊᖅᑎᓕᕆᔨᓄᑦ.  ᓄᐊᑉ ᐃᑉᐱᒍᓱᑦᓯᐊᖅᑐᖅ ᓄᓇᓕᒻᒥᓂᑦ ᓄᓇᓕᕐᓂᒥᐅᑕᓂᓪᓗ ᐊᒻᒪ ᐃᑲᔪᕈᒪᑐᐃᓐᓇᑦᓯᐊᐸᑦᑐᓂ ᐃᓐᓇᑐᖃᓕᕆᔪᓂᑦ ᖃᓄᑐᐃᓐᓇᑦᓯᐊᖅ.

“ᐊᑦᓱᕉᓴᐅᑏᑦ ᐊᕝᕕᐊᕈᑎᐅᖕᖏᑦᑐᑦ”

n.papatsie@city.iqaluit.nu.ca